sera da trofeas cun tscheina
Sonda ils 21 da schaner havein nus festivau nossa sera da trofea cun tscheina. Schegie ch’ei ha puspei dau in dètg tatsch neiv ein 54 envidai stai dalla partida en sala da scola a Curaglia. Tier in migiel vin alv avon tscheina han ils catschadurs contenplau la preit che purtava buca meins che 47 trofeas dalla catscha 2011. En cuort mument ei l’admosfera da catscha stada deresada en l’entira sala. Avon tscheina ha la gruppa da program presentau il decuors dalla sera. Il Corsin ed il Victor Flepp ed il Clau Venzin da Matergia han procurau l’entira sera cun bunas schgnoccas per empau da rir. Denteren han il duo Betschart aunc accumpignau nus cun lur „Schwiizerörgelis“
La famusa tscheina ha nies commember Aluis Albin surviu cun siu team. Suenter ina suppa da giutta e salata ha ei dau furtem cavriel e haxas cun pulenta rossa ed in gratin da truffels.
Uonn ha la secziun astgau undrar 3 commembers: Kurt Lützelschwab festivescha siu 20 onn en nossa secziun. Il Felix Venzin ed il Clau da Matergia ein daventai veterans dalla uniun da catschadurs da patenta cantunala (BKPJV). Cordiala gratulaziun.
Cu tuts han giu degustau il zugliau (strudel) da meila cun sosa da vaniglia eisi vegniu prelegiu la rangaziun dallas trofeas. Buca meins che 4 taurs tschiarva, 3 bucs camutsch, in buc cavriel, duas cauras camutsch ed ils dus capricorns han contonschiu ina medaglia. Cordiala gratulaziun als catschadurs. Suenter la tombola cun bials premis ei la part ufficiala stada a fin. Tochen viaden ella damaun eisi lu aunc vegniu patarlau latin da catschadurs.
Jeu less dir ina sera fetg bein gartegiada!
Vies president
Ursin Venzin
