Cronica dalla "Uniun da catschadurs Vallatscha"

Uniun da catschadurs Muraun Mustér

Dapi 1940 entochen 1942 ein ils catschadurs da Medel per part stai commembers dall'uniun da catschadurs Muraun/Mustér. 
Dus catschadurs Medelins han priu part 1941/ 1942 dalla catscha communala dal quel'uniun. Las empremas tschiarvas eran aunc fetg raras tier nus. Ils da Mustér levan pia far in manever pli grond en las Cavorgias, principalmein sin tschiarvas, mo quei di ha ei dau ora nuot auter ch'ina mondura bletscha ed il guoter da vinars vit.
En quella uniun ein stai commembers:
Lutz Theofil, Venzin Emil, Beeli Clau e Pally Clemens

Uniun da catschadurs Vallatscha Medel

Da s. Silvester 1942 han ils suandonts catschadurs Medelins concludiu da fundar in'uniun da catschadurs enta Medel:
Lutz Theofil, Venzin Emil, Beeli Clau, Pally Clemens, Beeli Martin fravi, Lutz Walter, Venzin Gion Fidel e Bundi Luis da 21.
Ils 10 da schaner 1943 ha giu liug ell'ustria dalla Posta a Curaglia la fundaziun definitiva ed elegiu la suandonta suprastonza:
president:    Lutz Theofil
cassier:        Beeli Clau
actura:         Pally Clemens

Davantai commembers dall'uniun cantunala

Ei era temps da mobilisaziun ed ils biars da nos catschadrus eran sin ils confins e pauca a casa, aschia ch'il contact mava empau a piarder e las radunonzas eran scartas. Igl onn 1943 ei la catscha stada aviarta il settember mo treis dis, entgins han survegniu congedi e saviu ira lu igl october dies dis a catscha. Quei onn ei vegniu manau atras negina catscha communabla. L'emprema scuntrada da quen havein fatg sin la radunonza generala dils 15 da december 1945. Quella sera mussava il quen da dus onns ina facultad da frs. 125.30. Medemamein havein approbau per daventar commembers dall'uniun cantunala da catschadurs. Ils 2 d'avrel 1945 eram vegni pri si en l'uniun cantunala. Nossa uniun dumbrava lu 13 commembers.

Da marcar eis ei aunc che l'emprema tschiarva (vacca) enta Medel ei vegnida sittada da nies amitg Beeli Martin fravi, igl onn 1940 si ils uauls Soliva e quei cun buis da schrecs.

(text ord il cudisch da giubileu 50 onns uniun da catschadurs Vallatscha)