Sco finiziun dall'emprema etappa dalla catscha aulta 2011 ha la secziun da catschadurs Vallatscha fatg catscha communabla la dumengia, dils 11 da settember.

Sco usitau essen serimnai allas 06:00 uras, uonn per l'emprema gada sil Cuntera en la sala nova. Suenter in cafè ed in strubiau (Gipfeli) ein lu buca meins che sis gruppas cun mintgamai 4 catschadurs vegnidas tratgas ord la capiala. Ils capos dallas gruppas han fatg plan da catscha ed allas siat eran gia tuts catschadurs sin via en lur territori.

Tochen miezdi eisi vegniu catschau caglias e stau a posta. La buanveglia ei stada gronda, denton il succes ei staus mudests. Nies cau da material il Paulin ha sittau in giattel muntaniala, ni in blau sco nus schein. Cordiala gratulaziun.

Il gentar han il Giochen ed il Felix Venzin cun famiglias preparau enta Acla. Suenter igl apperitiv eisi vegniu surviu in buontad furtem parlèr. Tut che ha magliau da bien gust ferton ch'ei era secapescha aunc da raquintar ina massa dil curriu e passau dall'jamna vargada. Era il dessert ha buca muncau tier il cafè ed il grappin.

In cordial engraziament als organisaturs per la buna tschavera.

In engraziel fetg era a tuts catschadurs ed allas duas catschaduras che han priu part ed aschia contribuiu lur part vid la cuminonza dalla secziun.