Poject Mireia

Project Mireia

Cun miez zercladur ein las lavurs vid il project Mireia idas a fin. Dapi la decisiun sin la radunonza atunila digl onn vargau eisi marschau pulit bia a Mireia:

Aschia han ins rumiau ora la hetta e rut atras la via d’access gia igl atun vargau. Questa primavera eisi lu iu vinavon cun las lavurs en fuorma d‘in di da lavur cumina: Sut la bitgèta da Aluis Huonder eisi vegniu montau in quader culau che porta ussa il tètg, enstagl dallas preits da spartida che han stuiu untgir alla nova cuschina. Victor Flepp ha coordinau ed organisau cun ses gidonters la fabricaziun dalla cuschina nova che ei il punct culminont da quei project. Avon tegia han Luis Giger e gidonters procurau ch’il begl niev da larisch, cavaus ord dad el sez, vegni plazzaus el dretg liug. El medem mument ha ina gruppa cavau il foss per satrar la lingia d’aua che spisgenta ussa il begl avon tegia.

Suenter quei di da lavur cumina ha ei lu aunc dau bia seras lavur per beinenqual commember entochen che tut las lavurs pintgas ein era stadas a fin. In grond engraziament a tut ils commembers ch‘ein segidai cun massa temps liber en favur dil project. En spezial eisi d’engraziar alla Firma Berther Bau und Industrie per tut las maschinas ch’ella ha mez a disposiziun gratuitamein, alla scrinaria Flepp SA per tut las uras da lavur e maschinas, alla picturia Gion Albin per la colur, alla firma Steger per las plattas e la maulta, al biro d’architectura Aluis Huonder per la projectaziun ed ils plans, a Felix Pally per las lavurs sanitaras, a Pirmin Flepp e Kevin Lechmann per las installaziuns da solar, a Hubertus Jacomet per las lavurs da lennari, alla famiglia Rinaldo Giger per il gentar dil di da lavur cumina ed ils utensils da cuschinar, ed a Matilda Venzin e Carla Giger per schubergiar ora l’entira hetta.

Cun la decisiun per quella investiziun da bunamein frs. 12‘000.- savein nus guder ussa nies liug da cumminonza cumpleinamein. Era egl avegnir duei qella hetta da catschadurs da suttetg a massa buns dialogs cun e senza latin.

Engraziel fetg!